سعودی عرب میں اونٹوں کو پاسپورٹ جاری کرنے کا اعلان

سعودی عرب نے ملک میں موجود لاکھوں اونٹوں کے لیے پاسپورٹ جاری کرنے کا منصوبہ شروع کرنے کا اعلان کیا ہے تاکہ مملکت کے قیمتی اونٹوں کے ریوڑوں کا بہتر انتظام اور نگرانی ممکن ہو سکے۔

فرانسیسی خبر رساں ادارے کے مطابق سعودی وزارتِ ماحولیات، پانی اور زراعت نے کہا ہے کہ اس اقدام سے اونٹوں کی پیداواری صلاحیت اور مجموعی کارکردگی میں اضافہ ہوگا، جبکہ اونٹوں کا ایک جامع اور قابلِ اعتماد ڈیٹا بیس بھی تیار کیا جا سکے گا۔

وزارت کی جانب سے سوشل میڈیا پر جاری کی گئی پوسٹ میں پاسپورٹ کی تصویر بھی شیئر کی گئی جو سبز رنگ کا ہے اور جس پر سعودی عرب کا قومی نشان اور سنہری رنگ میں اونٹ کی تصویر نمایاں ہے۔

سرکاری اعداد و شمار کے مطابق 2024 میں سعودی عرب میں اونٹوں کی تعداد تقریباً 22 لاکھ تھی۔ اونٹ صدیوں سے عرب دنیا میں نقل و حمل کا اہم ذریعہ رہے ہیں اور آج بھی یہ جانور مالکان کے لیے وقار اور سماجی حیثیت کی علامت سمجھے جاتے ہیں۔

اونٹوں کی افزائش سعودی عرب میں ایک منافع بخش صنعت کی شکل اختیار کر چکی ہے، اور ہر سال مختلف تہواروں میں اونٹوں کے حسن کے مقابلے بھی منعقد کیے جاتے ہیں، جہاں شوقین افراد اپنے اونٹوں پر لاکھوں ڈالر خرچ کرتے ہیں۔

حکام کے مطابق بعض مواقع پر بددیانت افراد غیر قانونی طریقوں سے مقابلوں میں برتری حاصل کرنے کی کوشش کرتے ہیں، جس کی روک تھام کے لیے اونٹوں کی باقاعدہ رجسٹریشن اور پاسپورٹ کا اجرا ایک اہم قدم ثابت ہوگا۔