ٹی 20 کے کپتان سلمان علی آغا کی چھٹی کا امکان

پاکستان کی ٹی 20 کرکٹ ٹیم کے کپتان سلمان علی آغا کو سری لنکا کے خلاف ہوم سیریز کے لیے آرام دیے جانے پر غور کیا جا رہا ہے، جس کے بعد قیادت میں تبدیلی کا امکان پیدا ہو گیا ہے۔ ذرائع کے مطابق ایشین گیمز کے لیے قومی ٹیم کی کپتانی سنبھالنے والے بیٹر صاحب زادہ فرحان کو سری لنکا کے خلاف ٹی 20 سیریز میں بھی قومی ٹیم کی قیادت سونپے جانے کا قوی امکان ہے۔

قومی کرکٹ ٹیم کے ہیڈ کوچ مائک ہیسن بھی صاحب زادہ فرحان کو کپتان برقرار رکھنے کے حامی بتائے جاتے ہیں۔ کرکٹ بورڈ کی انتظامیہ اور کوچنگ اسٹاف نے 2028ء کے ٹی 20 ورلڈ کپ کو مدنظر رکھتے ہوئے نئے کھلاڑیوں اور نئی قیادت کا پول تیار کرنے کے طویل المدتی منصوبے پر کام شروع کر دیا ہے۔ واضح رہے کہ پاکستان اور سری لنکا کے درمیان 3 ٹی 20 میچز پر مشتمل سیریز راولپنڈی کرکٹ اسٹیڈیم میں 9، 11 اور 13 اکتوبر کو کھیلی جائے گی۔