پاکستانی کوہ پیماساجد سدپارہ نے نیپال میں دنیاکی 5ویں بلندترین چوٹی سرکرلی

پاکستان کے نامور کوہ پیما ساجد علی سدپارہ نے نیپال میں واقع دنیا کی 5ویں بلند ترین چوٹی ماؤنٹ ماکالو کو اضافی آکسیجن کے بغیر سرکرلیا۔

ساجد سدپارہ 2 مئی کی صبح 5 بجے کامیابی سے  8ہزار 485میٹر بلندچوٹی پر پہنچے۔ان کے ساتھ ٹیم یوهانس لاؤ اور 7 شیرپا شامل تھے۔

ساجد سدپارہ دنیا کی 8ہزارمیٹرسے بلند تمام 14بلند چوٹیاں  اضافی آکسیجن کےبغیر سر کرنے کے مشن پر ہیں، اور ماکالو کی کامیاب چڑھائی اس سلسلے میں ان کی 10ویں بڑی کامیابی ہے۔ وہ 4 اپریل کو نیپال پہنچے ۔

ساجد، لیجنڈری کوہ پیما محمد علی سدپارہ کے صاحبزادے ہیں، جو 2021 میں کے ٹو کی سرمائی مہم کے دوران جان کی بازی ہار گئے تھے ۔

29سالہ ساجد اس سے قبل ایورسٹ، کے ٹو، نانگا پربت اور دیگر بلند چوٹیوں کو بھی سر کر چکے ہیں۔