بے روزگاری سے تنگ نوجوان نے بم کی افواہ پھیلا کر خود کو گرفتار کروا لیا

ماسکو/اوفا: روس کے شہر اوفا (Ufa) میں ایک 20 سالہ نوجوان نے بے روزگاری اور بھوک سے تنگ آکر جیل کی کوٹھڑی کو اپنا مسکن بنانے کے لیے بم کی جھوٹی افواہ پھیلا کر خود کو گرفتار کروا لیا۔ ہائی اسکول گریجویٹ اور سابق فوجی نوجوان نوکری کی تلاش میں ناکامی کے بعد اس حد تک مجبور ہو گیا کہ اس نے پیٹ بھرنے اور چھت حاصل کرنے کے لیے قید خانے کا انتخاب کیا۔

غیر ملکی خبر رساں ایجنسی کے مطابق، نوجوان نے پہلے ایک ہوٹل میں بم کی دھمکی دے کر خود کو کمرے میں بند کیا، لیکن عملے نے اسے سنجیدہ نہیں لیا۔ اپنی دوسری کوشش میں وہ اوفا ایئرپورٹ پہنچا اور ٹرمینل کے عین وسط میں بیگ اٹھا کر چیخنا شروع کر دیا کہ اس کے پاس بم ہے۔ ایئرپورٹ سیکیورٹی نے فوری کارروائی کرتے ہوئے اسے دبوچ لیا، تاہم تلاشی کے دوران بیگ سے کوئی دھماکا خیز مواد برآمد نہیں ہوا۔

دورانِ تفتیش نوجوان نے اعتراف کیا کہ اس نے یہ سب کچھ جان بوجھ کر کیا تاکہ اسے رہنے کو جگہ اور کھانے کو روٹی مل سکے۔ نفسیاتی معائنے میں اسے مکمل تندرست قرار دیا گیا، جس کے بعد عدالت نے اس کی “خواہش” پوری کرتے ہوئے اسے 3 سال اور 2 ماہ قید کی سزا سنا کر جیل بھیج دیا۔