ٹیسٹ کے دوران مشین گن بے قابو، فوجی اہلکار کو ہیلی کاپٹر بنا دیا

سوشل میڈیا پر روسی فوجیوں کی تربیتی مشق کے دوران ایک ہولناک اور خطرناک واقعے کی ویڈیو تیزی سے وائرل ہو رہی ہے، جس میں مبینہ طور پر ایک روسی فوجی ہیلی کاپٹر پر نصب کی جانے والی چار بیرل والی طاقتور روٹری مشین گن ‘وائی اے کے بی- 12.7’ (YakB-12.7) پر سے کنٹرول کھو دیتا ہے۔ سوویت دور کے جنگی ہیلی کاپٹر ایم آئی-24 (Mi-24) کے اگلے حصے پر نصب کیا جانے والا یہ ہتھیار ایک گاڑی پر بنے فکسڈ پلیٹ فارم کے ذریعے ڈرون شکن نظام کے طور پر استعمال کیا جا رہا تھا۔ جیسے ہی گن کو چلایا گیا، اس کے شدید جھٹکے (Recoil) اور ٹارک کی وجہ سے مشین گن اسٹینڈ سمیت بے قابو ہو کر دائروں میں گھومنے لگی جس سے آپریٹر ہوا میں اچھل کر دور جا گرا، جبکہ گولیوں کی بارش کے دوران وہاں موجود دیگر فوجیوں نے بھاگ کر اپنی جان بچائی۔ اگرچہ تاحال اس واقعے کے مقام اور تاریخ کی آزادانہ تصدیق نہیں ہوسکی اور نہ ہی روسی حکام کی جانب سے کوئی تبصرہ سامنے آیا ہے، تاہم بین الاقوامی رپورٹس کے مطابق اس واقعے میں کسی جانی نقصان کی اطلاع نہیں ملی۔