راجر فیڈرر ہال آف فیم میں شمولیت کی تقریب کے دوران جذباتی ہوگئے

نیوپورٹ: سوئٹزرلینڈ کے لیجنڈری ٹینس سٹار اور 20 مرتبہ کے گرینڈ سلم چیمپئن راجر فیڈرر انٹرنیشنل ٹینس ہال آف فیم (International Tennis Hall of Fame) میں باقاعدہ شمولیت کی تقریب کے دوران آبدیدہ ہو گئے۔

تقریب کے دوران راجر فیڈرر کا تعارف ان کی اہلیہ مرکا فیڈرر نے کرایا، جس کے بعد سٹیج پر پہنچ کر انہوں نے اپنی اہلیہ کا شکریہ ادا کرتے ہوئے انہیں گلے لگایا۔ تقریباً 30 منٹ پر محیط اپنی جذباتی تقریر کے دوران سابق عالمی نمبر ایک کھلاڑی متعدد بار اپنے جذبات پر قابو نہ رکھ سکے اور ان کی آنکھوں سے آنسو چھلک پڑے۔ انہوں نے اپنی تقریر میں بچپن کے ہیرو سٹیفن ایڈبرگ، اپنے دیرینہ کوچ سیورین لوتھی اور اہلیہ مرکا کا خصوصی ذکر کرتے ہوئے کہا کہ یہ دکھ کے نہیں بلکہ خوشی کے آنسو ہیں اور ان لمحات میں اپنے جذبات کو چھپانے کے لیے انہیں ٹشوز اور دھوپ کے چشمے کی ضرورت محسوس ہو رہی ہے۔

راجر فیڈرر کو ٹینس کی دنیا میں 20 گرینڈ سلم سنگلز ٹائٹلز جیتنے والے پہلے مرد کھلاڑی کے طور پر یاد رکھا جاتا ہے۔ اپنے شاندار کیریئر میں انہوں نے 8 مرتبہ ومبلڈن، 6 مرتبہ آسٹریلین اوپن، 5 مرتبہ یو ایس اوپن اور ایک مرتبہ فرنچ اوپن کا تاج اپنے نام کیا۔ وہ دنیا کے ان 8 عظیم ترین مرد کھلاڑیوں کی فہرست میں شامل ہیں جنہوں نے اپنے کیریئر کے دوران چاروں گرینڈ سلم ٹورنامنٹس (Career Grand Slam) جیتنے کا تاریخی اعجاز حاصل کیا۔