قومی ٹیم کا دورہ انگلینڈ: راشد لطیف کا بابر اعظم کو انگلش میڈیا سے دور رکھنے کا مشورہ

پاکستان کرکٹ ٹیم کے سابق کپتان اور وکٹ کیپر راشد لطیف نے قومی ٹیم کے انگلینڈ کے موجودہ دورے کے دوران کپتان بابر اعظم کو برطانوی میڈیا سے دور رکھنے کا مشورہ دیا ہے۔ نجی ٹی وی سے گفتگو کرتے ہوئے راشد لطیف نے کہا کہ پاکستان کرکٹ بورڈ (پی سی بی) کو ایسی حکمت عملی اپنائی جانی چاہیے جس سے بابر اعظم کا انگلش میڈیا سے کم سے کم سامنا ہو، کیونکہ برطانوی میڈیا اکثر مہمان ٹیموں اور ان کے کھلاڑیوں کو غیر ضروری تنازعات میں الجھانے کی کوشش کرتا ہے۔

سابق کپتان نے تجویز پیش کی کہ بابر اعظم کی جگہ شان مسعود کو میڈیا کے سامنے زیادہ بھیجا جائے کیونکہ وہ انگلش کاؤنٹی کرکٹ کھیلنے کے باعث وہاں کے میڈیا اور ماحول کو بہتر طریقے سے سمجھتے ہیں۔ راشد لطیف کے مطابق شان مسعود کے علاوہ امام الحق اور محمد عباس بھی برطانوی میڈیا سے گفتگو کے لیے بہترین انتخاب ہو سکتے ہیں۔ واضح رہے کہ قومی کرکٹ ٹیم تین ٹیسٹ میچوں کی سیریز کے لیے انگلینڈ پہنچ چکی ہے جہاں پہلا ٹیسٹ 19 اگست سے ہیڈنگلے، لیڈز میں کھیلا جائے گا۔