امریکا میں پکڑا جانے والا نایاب دو رنگی لابسٹر

امریکی ریاست میساچوسیٹس میں لابسٹر پکڑنے والی ایک کشتی نے جزیرہ نما کیپ کوڈ کے قریب سے ایک ایسا نایاب لابسٹر پکڑا ہے جس کا رنگ حیران کن طور پر آدھا آدھا مختلف ہے۔ ماہرین کے مطابق اس طرح کے دو رنگی لابسٹر بے حد نایاب ہوتے ہیں اور ایسی جینیاتی تبدیلی پانچ کروڑ میں سے کسی ایک لابسٹر میں پائی جاتی ہے۔ ‘ٹموتھی مائیکل’ نامی کشتی کے عملے نے اسے 16 اپریل کو دریافت کیا، جسے اب عوامی نمائش کے لیے ‘ووڈز ہول سائنس ایکوئیریم’ کے حوالے کرنے کا فیصلہ کیا گیا ہے۔ فی الحال یہ لابسٹر این او اے اے فشریز کی مرین بائیولوجیکل لیبارٹری کی نگرانی میں ہے اور ایکوئیریم کی مرمت مکمل ہونے کے بعد اسے وہاں منتقل کر دیا جائے گا جہاں یہ اپنی بقیہ زندگی گزارے گا۔