رحیم یار خان: بچے کے سینے سے دوسرا بچہ نکال لیا گیا

رحیم یار خان: شیخ زید میڈیکل کالج و ہسپتال رحیم یار خان میں ڈاکٹروں نے ایک نایاب اور معجزاتی سرجری انجام دیتے ہوئے پانچ سالہ بچے کے سینے سے نامکمل تشکیل پانے والا بچہ نکال لیا۔

تھوراسک سرجن ڈاکٹر سلطان محمود کے مطابق متاثرہ بچے ریحان کے سینے میں موجود یہ نامکمل بچہ دل کے انتہائی قریب مرکزی شریان کے پاس موجود تھا، جو ایک غیر معمولی اور خطرناک طبی کیفیت ہے۔ میڈیکل سائنس میں اس بیماری کو “Fetus in Fetu” کہا جاتا ہے، جو ہر پانچ لاکھ پیدائشوں میں سے ایک میں سامنے آتی ہے۔

ڈاکٹر سلطان محمود نے ماہر طبی ٹیم کے ہمراہ یہ نازک آپریشن کامیابی سے مکمل کیا۔ بچہ مسلسل کھانسی کی شکایت پر پلمونالوجی ڈیپارٹمنٹ لایا گیا تھا جہاں ٹیسٹ کے دوران یہ حیران کن انکشاف ہوا۔

متاثرہ بچے کی والدہ کے مطابق سرجری کے بعد بچے کی حالت تسلی بخش ہے اور وہ اب صحت یابی کی جانب گامزن ہے۔