کبوتر ایک لاکھ کی سونے کی چین چونچ میں دبا کر اڑ گیا

دیگانہ، راجستھان: بھارت کے شہر دیگانہ کی بلین مارکیٹ میں ایک غیر معمولی واردات دیکھنے کو ملی، جب ایک کبوتر نے زیورات کی دکان سے تقریباً ایک لاکھ روپے مالیت کی سونے کی زنجیر اپنی چونچ میں دباکر اُڑا لی۔

عینی شاہدین کے مطابق واقعہ اس وقت پیش آیا جب دکان کے کاریگر سونے کے زیورات تیار کرنے میں مصروف تھے۔ اچانک ایک کبوتر دکان میں داخل ہوا اور میز پر رکھی زنجیر چونچ میں پکڑ کر اُڑ گیا، جس سے دکان دار اور بازار میں موجود افراد خوفزدہ اور حیران رہ گئے۔

کبوتر دکان سے اُڑ کر قریبی چھت پر بیٹھ گیا، جہاں لوگوں نے اسے مسلسل دیکھ کر زنجیر واپس حاصل کرنے کی کوششیں کیں۔ کافی جدوجہد کے بعد کبوتر نیچے زمین پر زنجیر گرا گیا، جسے تاجروں نے بحفاظت اٹھا لیا۔

بلین مارکیٹ کے تاجروں نے کہا کہ سونے کی بڑھتی قیمتوں کے باعث سکیورٹی پہلے ہی ایک بڑا چیلنج ہے، لیکن یہ اپنی نوعیت کا پہلا واقعہ ہے کہ کسی کبوتر نے سونے کی چین اُڑا لی۔ یہ انوکھا واقعہ پورے بازار میں موضوعِ گفتگو بن گیا اور ہر کوئی اس غیر معمولی چوری پر حیرت کا اظہار کر رہا ہے۔