رحمت شاہ افغانستان کی ٹیسٹ اور ون ڈے ٹیموں کے نئے کپتان مقرر

افغانستان کرکٹ بورڈ (ACB) نے قومی کرکٹ ٹیم کی قیادت میں بڑی تبدیلی کرتے ہوئے تجربہ کار مڈل آرڈر بلے باز رحمت شاہ کو افغانستان کی ٹیسٹ اور ون ڈے (ODI) ٹیموں کا نیا کپتان مقرر کر دیا ہے۔ بورڈ کے باضابطہ اعلان کے مطابق جارح مزاج وکٹ کیپر بلے باز رحمان اللہ گرباز کو دونوں فارمیٹس کے لیے نائب کپتان کی ذمہ داری سونپی گئی ہے۔

افغانستان کرکٹ بورڈ کے ترجمان نے بتایا کہ رحمت شاہ کی بطور کپتان تقرری سابق کپتان حشمت اللہ شاہدی کے قیادت کے عہدے سے دستبردار ہونے کے بعد عمل میں لائی گئی ہے۔ حشمت اللہ شاہدی نے 55 ون ڈے انٹرنیشنل میچز میں قومی ٹیم کی قیادت کرنے کے بعد یہ عہدہ چھوڑنے کا فیصلہ کیا۔ بورڈ کے مطابق رحمت شاہ 2021 سے ٹیم کے نائب کپتان کی حیثیت سے ذمہ داریاں ادا کر رہے تھے، جس کی وجہ سے انہیں فیصلے سازی اور قیادت کا بہترین تجربہ حاصل ہے۔

بطور کپتان رحمت شاہ کا پہلا امتحان آئرلینڈ کے خلاف ہونے والی آئندہ سیریز ہوگی۔ واضح رہے کہ 2013 میں اپنے انٹرنیشنل کیریئر کا آغاز کرنے والے رحمت شاہ کو 128 ون ڈے اور 12 ٹیسٹ میچز کا وسیع تجربہ حاصل ہے، اور اسی شاندار ریکارڈ و تجربے کی بنیاد پر انہیں ٹیم کی باگ ڈور سونپی گئی ہے۔