20 ڈی ایس پیز کے خلاف محکمانہ کارروائیاں، سزائیں جاری

پنجاب پولیس میں احتساب، جزا و سزا کا عمل انتہائی تیزی سے جاری ہے، جہاں آئی جی پنجاب ڈاکٹر عبدالکریم کی زیرِ صدارت منعقدہ خصوصی “اردل رومز” کے دوران فرائض میں غفلت اور بدعنوانی پر 20 ڈی ایس پیز (DSPs) کے خلاف سخت محکمانہ سزاؤں کا فیصلہ کیا گیا ہے۔ ترجمان پنجاب پولیس کی جانب سے جاری کردہ تفصیلات کے مطابق، 9 جولائی کو منعقدہ اردل روم میں 3 ڈی ایس پیز کو بڑی (میجر) سزائیں دی گئیں، جن میں سنگین نوعیت کے الزامات ثابت ہونے پر ایک ڈی ایس پی کو نوکری سے برخاست کر دیا گیا جبکہ دوسرے ڈی ایس پی کو تنزلی کا نشانہ بناتے ہوئے سینئر ٹریفک وارڈن کے عہدے پر بھیج دیا گیا۔

ترجمان نے مزید بتایا کہ اس سے قبل ہونے والے مختلف اردل رومز کی سماعتوں میں بھی کڑے احتساب کے تحت 2 ڈی ایس پیز کو ملازمت سے برخاست، ایک کو عہدے سے ڈاؤن گریڈ، جبکہ 2 کی تنخواہوں میں کٹوتی کی جا چکی ہے۔ اس کے علاوہ مجموعی طور پر 17 ڈی ایس پیز کو ضابطہ اخلاق کی خلاف ورزی اور ناقص کارکردگی پر مختلف نوعیت کی تادیبی اور محکمانہ سزائیں دی گئی ہیں۔ آئی جی پنجاب نے واضح کیا ہے کہ محکمے میں کالی بھیڑوں کے لیے کوئی جگہ نہیں اور عوامی خدمت میں کوتاہی کرنے والے افسران کے خلاف بلاامتیاز کارروائی جاری رہے گی۔