خطے میں کشیدگی: متحدہ عرب امارات نے ایران سے تمام تجارتی، مالی معاملات معطل کر دیئے

متحدہ عرب امارات کی وزارتِ خارجہ نے ایران کے ساتھ تمام قسم کے تجارتی، کاروباری اور مالی معاملات کو تاحکمِ ثانی فوری طور پر معطل کرنے کا باضابطہ اعلان کر دیا ہے۔ وزارتِ خارجہ کے مطابق یہ انتہائی فیصلہ دونوں ممالک کے درمیان حالیہ عسکری کشیدگی اور امن و امان کی صورتِ حال کے پیشِ نظر کیا گیا ہے۔

اس فیصلے سے قبل اماراتی وزارتِ دفاع کی جانب سے ایک بیان جاری کیا گیا تھا جس میں بتایا گیا کہ ایران کی طرف سے متحدہ عرب امارات کی جانب 2 بیلسٹک میزائل داغے گئے۔ بیان کے مطابق ایک میزائل اماراتی سمندری حدود کے اندر جبکہ دوسرا حدود سے باہر گرا۔ اماراتی وزارتِ دفاع نے اپنے عزم کا اعادہ کرتے ہوئے واضح کیا ہے کہ متحدہ عرب امارات اپنی سرزمین کی حفاظت اور کسی بھی قسم کے بیرونی خطرات کا مقابلہ کرنے کے لیے پوری طرح تیار اور فعال ہے۔