بانی پی ٹی آئی کی صحت کیلئے دعا گو ہوں، طبی سہولیات ملنا سب کا حق ہے: شرجیل میمن

صوبائی وزیرِ اطلاعات سندھ شرجیل انعام میمن نے میڈیا سے گفتگو کرتے ہوئے کہا ہے کہ وہ بانی پی ٹی آئی کی صحتیابی کے لیے دعا گو ہیں اور بہترین طبی سہولیات کی فراہمی ہر شہری اور قیدی کا بنیادی حق ہے۔

ایم کیو ایم پاکستان کی قیادت کو نشانہ بناتے ہوئے شرجیل میمن نے کہا کہ خالد مقبول صدیقی اور مصطفیٰ کمال کی سیاست اب ختم ہو چکی ہے، اور وہ محض عوام کو اشتعال دلانے کے لیے سخت زبان استعمال کر رہے ہیں۔ انہوں نے مشورہ دیا کہ اگر ایم کیو ایم کے مطالبات وفاق سے پورے نہیں ہو رہے تو انہیں وفاقی وزارتیں چھوڑ دینی چاہئیں۔

نئے صوبوں کے قیام کے حوالے سے بات کرتے ہوئے وزیرِ اطلاعات سندھ نے واضح کیا کہ سندھ حکومت اور پاکستان پیپلز پارٹی اپنے واضح موقف پر قائم ہیں۔ انہوں نے کہا کہ آئین میں صوبوں کے قیام کا طریقہ کار بالکل واضح ہے، کوئی شخص آئین سے بالاتر نہیں، اور نئے صوبوں کے حوالے سے حتمی فیصلہ پارلیمنٹ اور عوام کو ہی کرنا ہے۔