ایران نے میزائل داغے جانے سے متعلق یو اے ای کا بیان مسترد کر دیا

ایران کی وزارتِ خارجہ کے ترجمان نے متحدہ عرب امارات (یو اے ای) کی سرزمین پر ایران سے بیلسٹک میزائل داغے جانے سے متعلق اماراتی بیان کو مکمل طور پر مسترد اور بے بنیاد قرار دے دیا ہے۔ ترجمان نے ایران کے خلاف اس قسم کے من گھڑت الزامات پر سخت تنبیہ کرتے ہوئے ‘فالز فلیگ آپریشنز’ (False Flag Operations) کا امکان ظاہر کیا ہے، جس کا مقصد خطے میں دونوں ممالک کے درمیان کشیدگی کو ہوا دینا ہو سکتا ہے۔

اس سے قبل متحدہ عرب امارات کی وزارتِ دفاع نے دعویٰ کیا تھا کہ ایرانی حدود سے داغے گئے دو بیلسٹک میزائلوں کا سراغ لگایا گیا ہے جو سمندری آمدورفت اور جہاز رانی کو نشانہ بنا رہے تھے اور سمندر میں جا گرے۔ اماراتی حکام کے مطابق، 4 مئی کو فجیرہ بندرگاہ پر ہونے والے حملے کے بعد یہ اپنی نوعیت کا پہلا بڑا واقعہ تھا، جس کے بعد امارات نے تجارتی تعلقات کی معطلی کا اعلان کیا تھا۔ تاہم تہران نے ایسے تمام دعووں کو یکسر رد کر دیا ہے۔