انمول پنکی کیخلاف قتل بالسبب کے مقدمہ میں فرد جرم عائد، ملزمہ کا صحت جرم سے انکار

کراچی کی ڈسٹرکٹ اینڈ سیشن عدالت (جنوبی) میں ملزمہ انمول عرف پنکی کے خلاف تھانہ بغدادی میں درج قتل بالسبب کے مقدمے کی سماعت کے دوران اہم پیشرفت سامنے آئی ہے۔ جیل حکام کی جانب سے ملزمہ کو ویڈیو لنک کے ذریعے عدالت میں پیش کیا گیا، جہاں فاضل عدالت نے ملزمہ پر باقاعدہ فرد جرم عائد کرتے ہوئے الزامات پڑھ کر سنائے۔

ملزمہ انمول عرف پنکی نے صحتِ جرم سے انکار کرتے ہوئے ٹرائل کا سامنا کرنے کی استدعا کی، جس پر عدالت نے کیس کی سماعت ملتوی کرتے ہوئے استغاثہ (پراسیکیوشن) کے گواہان کو 3 ستمبر کے لیے نوٹسز جاری کر کے طلب کر لیا ہے۔

واضح رہے کہ پولیس نے مقدمے کے حتمی چالان میں امداواً قتل کی دفعات خارج کر کے قتل بالسبب (Culpable Homicide Not Amounting to Murder) کی دفعات شامل کی تھیں، جبکہ پراسیکیوشن نے مزید شواہد جمع ہونے تک مقدمے کے التوا کی سفارش بھی کی تھی۔