پی ٹی آئی نے اپوزیشن لیڈر کی نامزدگی اسپیکر قومی اسمبلی کے سامنے جمع کرادی

اسلام آباد: اسپیکر قومی اسمبلی ایاز صادق سے پی ٹی آئی وفد نے ملاقات کی جس میں اپوزیشن لیڈر کی تقرری پر مشاورت ہوئی۔ پی ٹی آئی وفد میں بیرسٹر گوہر علی، اسد قیصر، عامر ڈوگر اور اقبال آفریدی شامل تھے۔

پی ٹی آئی نے اپوزیشن لیڈر کے لیے باضابطہ نامزدگی جمع کرادی ہے، جس میں محمود خان اچکزئی کا نام شامل ہے۔ بیرسٹر گوہر علی نے میڈیا سے گفتگو میں کہا کہ جمعرات تک اپوزیشن لیڈر کا تقرر ہوجائے گا اور اب تک صرف ایک ہی نامزدگی موصول ہوئی ہے۔ انہوں نے مزید کہا کہ پی ٹی آئی میں کوئی فارورڈ بلاک نہیں ہے اور خان صاحب کے فیصلے کو کوئی سیاسی یا اپیکس کمیٹی تبدیل نہیں کرسکتی۔

اسد قیصر نے کہا کہ اسپیکر ہی سب کچھ طے کرتے ہیں اور جب قومی اسمبلی میں اپوزیشن لیڈر کا تقرر ہوجائے گا تو سینیٹ میں بھی اپوزیشن لیڈر کی تقرری ہوجائے گی۔