پی ٹی آئی کے چیف وہپ کا اسپیکر قومی اسمبلی کو خط، اپوزیشن لیڈر کے فوری نوٹیفکیشن کا مطالبہ

اسلام آباد: قومی اسمبلی میں پاکستان تحریکِ انصاف کے چیف وہپ ملک عامر ڈوگر نے اسپیکر سردار ایاز صادق کو خط لکھ کر اپوزیشن لیڈر کی تقرری سے متعلق نوٹیفکیشن فوری جاری کرنے کا مطالبہ کیا ہے۔

خط میں کہا گیا ہے کہ اپوزیشن کی اکثریت نے محمود خان اچکزئی کو متفقہ طور پر قائد حزبِ اختلاف نامزد کیا ہے، لیکن اپوزیشن لیڈر کا عہدہ تاحال خالی ہے۔ ملک عامر ڈوگر نے جمہوری روایات کے تحت اپوزیشن کو اپنا قائد منتخب کرنے کا حق حاصل ہونے کی جانب توجہ دلائی۔

انہوں نے قومی اسمبلی رولز آف پروسیجر اینڈ کنڈکٹ 2007 کے رول 39 کے تحت اسپیکر سے فوری نوٹیفکیشن جاری کرنے کی درخواست کی ہے۔