کے ایس ای 100 انڈیکس میں 5,336 پوائنٹس کی زبردست تیزی، سرمایہ کاروں نے 482 ارب روپے کما لیے

پاکستان اسٹاک ایکسچینج (PSX) میں گزشتہ کاروباری ہفتے کے دوران زبردست تیزی ریکارڈ کی گئی، جہاں سرمایہ کاروں کے زبردست اعتماد کے باعث مارکیٹ میں مثبت رجحان غالب رہا اور سرمایہ کاروں نے ایک ہی ہفتے میں 482 ارب روپے کا منافع حاصل کیا۔

ہفتہ وار کاروباری رپورٹ کے مطابق کے ایس ای 100 انڈیکس 3.03 فیصد کی نمو کے ساتھ 5 ہزار 336 پوائنٹس کے اضافے پر بند ہوا۔ اس تیزی کے نتیجے میں 100 انڈیکس ہفتے کے اختتام پر 1,81,430 پوائنٹس کی بلند سطح پر بند ہوا۔ کاروباری ہفتے کے دوران انڈیکس کی بلند ترین سطح 1,82,007 پوائنٹس جبکہ کم ترین سطح 1,77,043 پوائنٹس ریکارڈ کی گئی۔

مارکیٹ کیپیٹلائزیشن 482 ارب روپے کے اضافے کے بعد 20 ہزار 238 ارب روپے کی مجموعی سطح پر پہنچ گئی۔ اگرچہ مارکیٹ کا اوسط یومیہ تجارتی حجم 9.9 فیصد کی کمی کے ساتھ 74 کروڑ 93 لاکھ شیئرز رہا، تاہم اوسط یومیہ تجارتی مالیت 7 فیصد اضافے کے ساتھ 12 کروڑ 19 لاکھ ڈالر تک جا پہنچی، جو مارکیٹ میں بڑے سرمایہ کاروں کے مثبت تحرک کی عکاسی کرتی ہے۔