پی ایس ایل 11کے شیڈول کا اعلان، ایونٹ کا آغاز26مارچ کوہوگا

پاکستان سپر لیگ سیزن الیون  کے شیڈول کا اعلان کردیا گیا ہے۔ ۔ پہلی بار آٹھ ٹیمیں ٹرافی کے حصول کی جنگ لڑیں گی۔ فیصل آباد اور پشاور میں بھی میچز کھیلے جائیں گے

پاکستان کرکٹ بورڈ نے پی ایس ایل سیزن الیون کے شیڈول کا باضابطہ اعلان کردیا ہے ۔ ایونٹ کا آغاز 26 مارچ کو لاہور میں ہوگا ۔ مجموعی طور پر 44 میچز کھیلے جائیں گے۔

سیزن الیون میں پہلی بار آٹھ ٹیمیں ٹرافی کے حصول کے لیے میدان میں اتریں گی، حیدرآباد کنگز مین اور راولپنڈی پنڈیز لیگ میں شامل ہونے والی نئی فرنچائزز ہیں ۔

پاکستان سپر لیگ سیزن الیون کے میچز چھ مختلف شہروں میں کھیلے جائیں گے۔افتتاحی تقریب قذافی اسٹیڈیم لاہور میں 26 مارچ کو منعقد ہوگی پہلا میچ لاہور قلندرز اور حیدرآباد کنگز مین کے درمیان کھیلا جائے گا ۔فیصل آباد اور پشاور اسٹیڈیم پہلی بار پاکستان سپر لیگ کے میچز کی میزبانی کریں گے۔

ہر ٹیم لیگ مرحلے میں دس میچز کھیلے گی، پلے آف میچز 28 اپریل سے شروع ہوں گے۔

راولپنڈی کرکٹ اسٹیڈیم میں گیارہ گروپ میچز کھیلے جائیں گے، ایک کوالیفائر بھی شامل ہے۔قذافی اسٹیڈیم لاہور میں 15 میچز شیڈول ہیں۔فیصل آباد میں  سات میچز کھیلے جائیں گے۔ملتان کرکٹ سٹیڈیم میں چار میچز میں ملتان سلطانز ایکشن میں ہوں گے۔نیشنل اسٹیڈیم کراچی چھ میچز کی میزبانی کرے گا ۔