پی ایس ایل 11، آج کوئٹہ گلیڈی ایٹڑز اور راولپنڈیز میں جوڑ پڑے گا

پاکستان سپر لیگ (پی ایس ایل) ایڈیشن 11 کے سنسنی خیز مقابلوں کا سلسلہ جاری ہے اور آج کوئٹہ گلیڈی ایٹرز اور راولپنڈیز کی ٹیمیں کراچی کے نیشنل سٹیڈیم میں آمنے سامنے ہوں گی۔ یہ میچ شام سات بجے شروع ہوگا جس میں کوئٹہ کی قیادت مایہ ناز بلے باز سعود شکیل کر رہے ہیں جبکہ راولپنڈیز کی کمان اسٹار وکٹ کیپر بیٹر محمد رضوان کے ہاتھوں میں ہے۔ دونوں ٹیموں کے لیے یہ مقابلہ انتہائی اہمیت کا حامل ہے کیونکہ ٹورنامنٹ کے اگلے مرحلے تک رسائی کے لیے پوائنٹس ٹیبل پر پوزیشن بہتر بنانا ضروری ہے۔

ٹورنامنٹ کی موجودہ صورتحال پر نظر ڈالی جائے تو دونوں ٹیمیں اب تک چار چار میچز کھیل چکی ہیں، تاہم اب تک کی کارکردگی میں کوئٹہ گلیڈی ایٹرز کا پلہ قدرے بھاری دکھائی دیتا ہے جس نے ایک میچ میں کامیابی حاصل کر رکھی ہے۔ اس کے برعکس، محمد رضوان کی راولپنڈیز تاحال اپنی پہلی فتح کی تلاش میں ہے اور اسے لگاتار چار میچوں میں ناکامی کا سامنا کرنا پڑا ہے۔ پوائنٹس ٹیبل پر کوئٹہ گلیڈی ایٹرز اس وقت چھٹے نمبر پر موجود ہے جبکہ راولپنڈیز آٹھویں پوزیشن پر براجمان ہے۔ شائقینِ کرکٹ کو آج ایک کانٹے دار مقابلے کی توقع ہے جہاں دونوں ٹیمیں فتح حاصل کر کے ایونٹ میں واپسی کے لیے سر دھڑ کی بازی لگائیں گی۔