پی ایس ایل11 ، پشاور زلمی اور ملتان سلطانز آج مدِمقابل آئیں گی

پاکستان سپر لیگ (PSL) کے 11ویں ایڈیشن میں آج ایک سنسنی خیز مقابلہ متوقع ہے جہاں پوائنٹس ٹیبل کی دو بہترین ٹیمیں، پشاور زلمی اور ملتان سلطانز، آمنے سامنے ہوں گی۔ یہ اہم میچ آج شام سات بجے کراچی کے نیشنل اسٹیڈیم میں کھیلا جائے گا۔ پشاور زلمی کی قیادت اسٹار بیٹر بابر اعظم کر رہے ہیں، جبکہ ملتان سلطانز کی کمان آشٹن ٹرنر کے ہاتھوں میں ہے۔ دونوں ٹیموں کے درمیان اس مقابلے کو ٹورنامنٹ کا سب سے بڑا معرکہ قرار دیا جا رہا ہے کیونکہ دونوں ہی ٹیمیں اس وقت بہترین فارم میں ہیں۔

اعداد و شمار کے لحاظ سے دیکھا جائے تو پی ایس ایل 11 میں اب تک دونوں ٹیموں کا سفر تقریباً یکساں رہا ہے۔ دونوں ٹیموں نے اب تک پانچ پانچ میچز کھیلے ہیں، جن میں سے چار چار میں کامیابی حاصل کی جبکہ صرف ایک ایک میچ میں انہیں شکست کا سامنا کرنا پڑا۔ بہتر رن ریٹ کی بنیاد پر پشاور زلمی پوائنٹس ٹیبل پر پہلے نمبر پر براجمان ہے جبکہ ملتان سلطانز دوسرے نمبر پر موجود ہے۔ آج کے میچ میں جو بھی ٹیم فاتح قرار پائے گی، وہ ٹیبل پر پہلی پوزیشن پر اپنی گرفت مزید مضبوط کر لے گی۔ شائقینِ کرکٹ بابر اعظم کی بیٹنگ اور ملتان کے مضبوط باؤلنگ اٹیک کے درمیان مقابلے کا بے صبری سے انتظار کر رہے ہیں۔