پی ایس ایل 11 فائنل: وزیراعظم شہباز شریف نے تماشائیوں کو سٹیڈیم آنے کی اجازت دیدی

چیئرمین پی سی بی محسن نقوی نے اعلان کیا ہے کہ وزیراعظم شہباز شریف نے پاکستان سپر لیگ (پی ایس ایل) کے گیارھویں ایڈیشن کے فائنل میچ کے لیے تماشائیوں کو اسٹیڈیم آنے کی باقاعدہ اجازت دے دی ہے۔ سوشل میڈیا پر جاری اپنے ایک بیان میں محسن نقوی نے بتایا کہ انہوں نے فرنچائز مالکان کی درخواست پر وزیراعظم سے شائقین کی شرکت کے لیے خصوصی اپیل کی تھی، جسے منظور کر لیا گیا ہے۔

واضح رہے کہ مشرقِ وسطیٰ کی موجودہ صورتحال اور ایران امریکہ تنازع کے باعث پیدا ہونے والے ممکنہ تیل بحران کے پیشِ نظر، حکومتِ پاکستان نے ملک بھر میں ایندھن کی بچت کے لیے سخت کفایت شعاری مہم نافذ کر رکھی ہے۔ اسی مہم کے باعث بڑے اجتماعات اور عوامی نقل و حرکت پر بعض پابندیاں زیرِ غور تھیں، تاہم کرکٹ شائقین کے جذبے کو مدنظر رکھتے ہوئے یہ خصوصی رعایت دی گئی ہے۔

محسن نقوی نے اس فیصلے پر وزیراعظم کا شکریہ ادا کرتے ہوئے کہا کہ شہباز شریف خود بھی شائقین کو اسٹیڈیم میں دیکھنے کے خواہش مند تھے۔ اس فیصلے سے جہاں کرکٹ شائقین میں خوشی کی لہر دوڑ گئی ہے، وہاں پی سی بی اب فائنل کے لیے انتظامات کو حتمی شکل دے رہا ہے تاکہ کفایت شعاری کے اصولوں کو مدنظر رکھتے ہوئے ایونٹ کا کامیاب انعقاد یقینی بنایا جا سکے۔