پاکستان میں فٹ بال کے فروغ کا تاریخی سنگ میل، پرتگالی کلب ایف سی پورٹو کی سیالکوٹ میں انٹری

پاکستان میں فٹ بال کے کھیل کے فروغ اور ترقی کے لیے ایک بڑی پیش رفت سامنے آئی ہے، جہاں پرتگال کے نامور فٹ بال کلب ‘ایف سی پورٹو’ (FC Porto) نے سیالکوٹ فٹ بال اکیڈمی کے ساتھ ایک تاریخی شراکت داری کا معاہدہ کر لیا ہے۔ اس معاہدے کے تحت سیالکوٹ میں پرتگالی کلب کے تعاون سے “ڈریگن فورس بائی ایف سی پورٹو” (Dragon Force by FC Porto) کے نام سے ایک عالمی معیار کی فٹ بال اکیڈمی قائم کی جائے گی، جو فیفا ورلڈ کپ کے آفیشل بالز بنانے والے معروف ادارے ‘فارورڈ اسپورٹس’ کی سرپرستی میں فعال کی جائے گی۔

اس شراکت داری کے ذریعے ایف سی پورٹو اپنا جدید یورپی تربیتی ماڈل اور پیشہ ورانہ تجربہ پاکستان منتقل کرے گا، تاکہ مقامی نوجوان کھلاڑیوں کی صلاحیتوں کو بین الاقوامی معائر کے مطابق نکھارا جا سکے اور انہیں مستقبل کا چیمپئن بنایا جا سکے۔ سیالکوٹ اکیڈمی کا قیام عمل میں آنے کے بعد ایف سی پورٹو کے عالمی تربیتی نیٹ ورک میں زیرِ تربیت نوجوانوں کی مجموعی تعداد 11 ہزار سے تجاوز کر جائے گی۔ اس پیش رفت کو پاکستان اور پرتگال کے درمیان اسپورٹس ڈپلومیسی اور کھیل کے شعبے میں ایک نئے دور کا آغاز قرار دیا جا رہا ہے۔