پولینڈ: جعلی پیزا آرڈر دیکر کمپنیوں کو مالی نقصان پہنچانے والا نوجوان گرفتار

وارسا: پولینڈ میں پولیس نے ایک 23 سالہ نوجوان کو شہریوں کو ہراساں کرنے، شناخت کا غلط استعمال کرنے اور ملک بھر میں سینکڑوں جعلی پیزا آرڈرز دے کر کاروبار کو بھاری مالی نقصان پہنچانے کے الزام میں گرفتار کر لیا ہے۔

پولینڈ کے ‘سنٹرل بیورو فار کومبیٹنگ سائبر کرائم’ کے مطابق، ملزم مختلف شہریوں کی خبر کے بغیر ان کے نام پر مختلف پتوں پر پیزا ڈیلیوری کے آرڈرز بھیجتا تھا۔ اس کارروائی سے متعدد فوڈ ڈیلیوری کمپنیوں اور پیزیریا کو ہزاروں ڈالر کا نقصان اٹھانا پڑا۔

تحقیقات میں یہ خوفناک انکشاف سامنے آیا کہ ملزم آرڈرز کے ساتھ متاثرہ افراد کی ایسی حساس ذاتی معلومات اور خفیہ باتیں بھی شامل کرتا تھا جو صرف ان کے قریبی دوستوں یا گھر والوں کے علم میں ہوتی تھیں۔ علاوہ ازیں، بعض آرڈرز میں سنگین دھمکیاں بھی بھیجی جاتی تھیں، جن میں بچوں کے اغوا، کام کی جگہوں کو آگ لگانے اور روڈ حادثات کروانے کے انتباہات شامل تھے۔

سائبر کرائم پولیس نے تکنیکی شواہد کی مدد سے ملزم کا سُراغ لگا کر اسے حراست میں لے لیا ہے، جبکہ اس کے خلاف ہراسانی، دھوکہ دہی اور دھمکیوں کے الزامات کے تحت مزید قانونی کارروائی جاری ہے۔