لاہور ایئرپورٹ پر بڑی کارروائی؛ لندن سے پہنچتے ہی پوڈ کاسٹر ریحان طارق گرفتار

معروف پوڈ کاسٹر ریحان طارق کو لندن سے پاکستان پہنچتے ہی لاہور ایئرپورٹ پر این سی سی آئی اے (NCCIA) نے گرفتار کر لیا ہے۔ خاندانی ذرائع کے مطابق ریحان طارق رات ایک بجے لندن سے پرواز کے ذریعے علامہ اقبال انٹرنیشنل ایئرپورٹ پہنچے تھے، جہاں سب سے پہلے ایف آئی اے نے انہیں روک لیا اور بعد ازاں این سی سی آئی اے کے اہلکار آ کر انہیں اپنے ساتھ لے گئے۔ ذرائع کا کہنا ہے کہ ریحان طارق کا نام پی این آئی ایل (PNIL) لسٹ میں شامل تھا، اور ایئرپورٹ پر چیکنگ کے دوران مقدمہ اور لسٹ میں نام سامنے آنے پر یہ گرفتاری عمل میں آئی۔ این سی سی آئی اے لاہور میں ان کے خلاف مقدمہ درج ہے، تاہم ایجنسی کے ترجمان نے فی الحال اس حساس معاملے پر کوئی بھی مؤقف دینے سے گریز کیا ہے۔