وزیراعظم کی این ڈی ایم اے کو مون سون میں صوبوں کیساتھ بہتر روابط کی ہدایت

وزیرِ اعظم شہباز شریف سے نیشنل ڈیزاسٹر مینجمنٹ اتھارٹی (این ڈی ایم اے) کے چیئرمین لیفٹیننٹ جنرل انعام حیدر ملک نے ملاقات کی، جس میں ملک میں مون سون بارشوں کے دوران کسی بھی ہنگامی صورتحال سے نمٹنے کی تیاریوں کا تفصیلی جائزہ لیا گیا۔ وزیرِ اعظم آفس کی جانب سے جاری کردہ اعلامیے کے مطابق، شہباز شریف نے مون سون سیزن کے دوران صوبائی حکومتوں اور صوبائی ڈیزاسٹر مینجمنٹ اتھارٹیز (پی ڈی ایم ایز) کے ساتھ روابط اور کوآرڈینیشن کو مزید مربوط اور بہتر بنانے کی سخت ہدایت کی ہے۔ ملاقات کے دوران چیئرمین این ڈی ایم اے نے وزیرِ اعظم کو بارشوں اور سیلابی صورتحال کی مانیٹرنگ، پیشگی اطلاع دینے والے نظام (Early Warning System) کو مکمل طور پر فعال بنانے اور اس ضمن میں وزارتِ موسمیاتی تبدیلی کے ساتھ جاری قریبی تعاون اور پیش رفت سے متعلق تفصیلی بریفنگ دی۔