فلپائنی جوڑے نے سیلاب میں ڈوبے چرچ میں بندھن جوڑ لیا

منیلا: فلپائن میں شدید مون سون بارشوں اور طوفانی سیلاب کے باوجود ایک جوڑے نے گھٹنوں تک ڈوبے ہوئے چرچ میں شادی کی تقریب منعقد کر کے سب کی توجہ حاصل کر لی۔

فلپائنی دارالحکومت منیلا کے شمال میں واقع ‘ہاگونوئے’ ٹاؤن کے ‘سینٹ جان دی بپٹسٹ’ چرچ میں جب دلہن ‘لیان لیزا گالانگ’ اور دولہا ‘گلبرٹ چیکو’ پہنچے تو چرچ کا پورا صحن اور اندرونی حصہ سیلابی پانی سے بھرا ہوا تھا۔ چرچ انتظامیہ نے بڑھتے ہوئے پانی کے باعث شادی ملتوی کرنے کا مشورہ دیا، تاہم جوڑے نے تمام تر مشکلات کے باوجود تقریب کو ہر حال میں مکمل کرنے کا فیصلہ کیا۔ سفید عروسی لباس میں ملبوس دلہن نے گدلے پانی سے گزر کر چرچ کی راہداری طے کی اور پادری نے مختصر تقریب میں دونوں کو میاں بیوی قرار دے دیا۔

دولہا گلبرٹ چیکو، جو مشرقِ وسطیٰ میں بطور رِگر کام کرتے ہیں، نے میڈیا کو بتایا کہ ان کے لیے کپڑوں کے بھیگنے سے زیادہ ایک دوسرے کے ساتھ رشتہ ازدواج میں منسلک ہونا اہم تھا۔ دلہن کے لباس کو پانی سے بچانے کے لیے اس کے دامن کو مختصر کیا گیا جبکہ جوڑا بلند شاسی والی گاڑی کے ذریعے چرچ پہنچا۔ فلپائن کے شمالی حصوں میں جاری اگست کی ان شدید مون سون بارشوں اور سیلاب سے اب تک کم از کم 34 افراد ہلاک ہو چکے ہیں، تاہم اس سخت صورتحال میں بھی اس جوڑے کے عزم و محبت کی یہ تصاویر اور ویڈیوز عالمی میڈیا پر وائرل ہو رہی ہیں۔