ملک بھر سے 441 سکولز نیشنل ہاکی پورٹل پر رجسٹرڈ ہو گئے

پاکستان ہاکی فیڈریشن (PHF) نے ملک بھر میں قومی کھیل کے فروغ اور گراس روٹ لیول پر بہتری کے لیے جاری ‘اسکولز پروگرام’ میں نمایاں پیش رفت کا اعلان کیا ہے۔ فیڈریشن کے مطابق نیشنل ہاکی پورٹل پر اب تک 441 اسکولز باضابطہ طور پر رجسٹرڈ ہو چکے ہیں، جبکہ اگلے 02 ہفتوں میں یہ تعداد 1,000 تک پہنچنے کی قوی توقع ہے۔ PHF نے واضح کیا ہے کہ 1,000 اسکولوں کا ہدف پورا ہوتے ہی رجسٹرڈ اداروں میں مفت ہاکی کٹس اور دیگر کھیلوں کا سامان تقسیم کیا جائے گا۔ مزید برآں، گراس روٹ پر معیارِ کھیل کو بہتر بنانے کے لیے تمام اضلاع میں سند یافتہ ہاکی کوچز تعینات کرنے کا فیصلہ کیا گیا ہے، جبکہ اس تسلسل کو برقرار رکھتے ہوئے فروری 2027 میں ملک کی پہلی تاریخ ساز نیشنل انڈر-15 ہاکی چیمپئن شپ کا انعقاد کیا جائے گا۔