جونیئر اور سینئر ہاکی ٹیموں کے ٹرائلز اور ٹریننگ کیمپ کا شیڈول جاری

پاکستان ہاکی فیڈریشن (پی ایچ ایف) نے ملک میں قومی کھیل کی بحالی اور مستقبل کو مضبوط بنانے کے لیے جونیئر اور سینئر ٹیموں کے ٹرائلز اور ٹریننگ کیمپ کا جامع شیڈول جاری کر دیا ہے۔ صدر پی ایچ ایف محئی الدین وانی کے مطابق، قومی سلیکشن کمیٹی اور ہیڈ کوچز ملک کے بڑے شہروں کا دورہ کر کے باصلاحیت کھلاڑیوں کا انتخاب کریں گے۔ شیڈول کے تحت قومی انڈر 18 ٹیم کے اوپن ٹرائلز 16 اپریل کو لاہور کے نیشنل سٹیڈیم میں ہوں گے، جبکہ اسلام آباد میں یہ ٹرائلز 20 اور 21 اپریل کو منعقد کیے جائیں گے۔

سینئر ہاکی ٹیم کے حوالے سے جاری کردہ تفصیلات کے مطابق، تربیتی کیمپ کے لیے کھلاڑیوں کے ٹرائلز کا آغاز 13 اپریل کو عبدالستار ایدھی ہاکی سٹیڈیم کراچی سے ہوگا۔ اس مرحلے پر سابقہ قومی ٹیم کے ارکان اور سٹینڈ بائی رہنے والے 28 کھلاڑیوں کو ٹرائلز سے استثنیٰ حاصل ہوگا۔ مزید برآں، لاہور میں 15 اپریل اور پشاور میں 23 اپریل کو اوپن ٹرائلز لیے جائیں گے۔

صدر پی ایچ ایف نے بتایا کہ ان ٹرائلز کے بعد منتخب ہونے والے کھلاڑیوں کے لیے سینئر ٹیم کا خصوصی تربیتی کیمپ یکم مئی سے اسلام آباد میں شروع ہوگا۔ انہوں نے اس عزم کا اعادہ کیا کہ ان شفاف ٹرائلز اور تربیتی کیمپوں کا مقصد پاکستان ہاکی کے ڈھانچے کو جدید خطوط پر استوار کرنا اور باصلاحیت نوجوانوں کو آگے لانا ہے تاکہ عالمی سطح پر پاکستان کا وقار بلند کیا جا سکے۔