پاکستان نے طویل عرصے بعد ورلڈ کپ میں بہتر کھیل پیش کیا: پی ایچ ایف کا اظہارِاطمینان

پاکستان ہاکی فیڈریشن (PHF) نے ورلڈ کپ کے دوران قومی ہاکی ٹیم کی نمایاں بہتری پر اطمینان کا اظہار کیا ہے۔ ترجمان پی ایچ ایف کے مطابق طویل عرصے بعد ورلڈ کپ کے لیے کوالیفائی کرنے والی قومی ٹیم نے ساؤتھ افریقہ اور جاپان کو شکست دی جبکہ ویلز کے خلاف میچ ڈرا رہا۔ فیڈریشن نے باب ویلڈے ہاف، عدنان ذاکر اور کرس بوون پر مشتمل بین الاقوامی کوچنگ سٹاف کی کاوشوں کو سراہا، جبکہ نیشنل کوچنگ ایڈوائزر ہرمن کروئس کی تکنیکی رہنمائی میں تمام قومی ٹیموں (سینئر، انڈر 21، انڈر 18 اور ویمنز) کے لیے مربوط نظام جاری رکھنے کا اعلان کیا۔ پی ایچ ایف کا کہنا ہے کہ ورلڈ کپ میں سامنے آنے والی خامیوں کو دور کر کے ایشین گیمز اور آنے والے بین الاقوامی مقابلوں کے لیے زیادہ مضبوط اور مسابقتی ٹیم تیار کی جائے گی۔