پی ایچ ایف نے کینیڈین ہاکی ٹیم کے دورۂ پاکستان کی نوید سنا دی

پاکستان ہاکی فیڈریشن (PHF) نے انٹرنیشنل ہاکی کی بحالی کی جانب ایک اور بڑی پیش رفت کرتے ہوئے کینیڈین ہاکی ٹیم کے دورۂ پاکستان کی باضابطہ تصدیق کر دی ہے۔

پاکستان ہاکی فیڈریشن کے ترجمان کے مطابق کینیڈا کی قومی ہاکی ٹیم فروری 2027 میں پاکستان کا مکمل دورہ کرے گی۔ دونوں ممالک کے درمیان پرجوش ہاکی سیریز 8 سے 21 فروری 2027 تک وفاقی دارالحکومت اسلام آباد میں کھیلی جائے گی۔

پی ایچ ایف کے صدر محی الدین وانی نے اس اہم پیش رفت پر اپنے خیالات کا اظہار کرتے ہوئے کہا کہ کینیڈا کا یہ دورہ پاکستان میں عالمی ہاکی کے دروازے مکمل طور پر کھولنے میں اہم سنگِ میل ثابت ہوگا۔ انہوں نے کینیڈین ہاکی ٹیم کی آمد کا پرجوش خیرمقدم کرتے ہوئے کہا کہ مہمان ٹیم کی میزبانی اور سکیورٹی کے لیے بہترین اور مثالی انتظامات کیے جائیں گے۔ ان کا کہنا تھا کہ اس سیریز سے نہ صرف پاکستان اور کینیڈا کے درمیان کھیلوں کے دوطرفہ تعلقات مزید مضبوط ہوں گے بلکہ ملک میں عالمی مقابلے باقاعدگی سے انعقاد پذیر کرنے کی کوششیں بھی رنگ لائیں گی۔