اولمپین طاہر زمان پاکستان ہاکی فیڈریشن (PHF) کے ڈائریکٹر ہائی پرفارمنس اینڈ ڈویلپمنٹ مقرر

پاکستان ہاکی فیڈریشن (PHF) نے قومی کھیل کی کھوئی ہوئی ساکھ کی بحالی اور کھلاڑیوں کی کارکردگی کو بین الاقوامی معیار کے مطابق بنانے کے لیے ایک بڑا فیصلہ کرتے ہوئے نامور اولمپین طاہر زمان کو ڈائریکٹر ہائی پرفارمنس اینڈ ڈویلپمنٹ مقرر کر دیا ہے۔

پاکستان ہاکی فیڈریشن کی جانب سے جاری کردہ باضابطہ اعلامیے کے مطابق، طاہر زمان کا شمار دنیا کے چند بہترین ہاکی ماہرین میں ہوتا ہے۔ وہ انٹرنیشنل ہاکی فیڈریشن (FIH) کے مصدقہ ‘ہائی پرفارمنس لیول 6 کوچ’ ہیں، جو کہ دنیا میں کوچنگ کا سب سے اعلٰی ترین گریڈ مانا جاتا ہے۔ اس کے علاوہ اولمپین طاہر زمان عالمی سطح پر ‘ایف آئی ایچ رولز بورڈ کمیٹی’ (FIH Rules Board Committee) کے معزز رکن کے طور پر بھی ملک کی نمائندگی کر رہے ہیں اور دنیا بھر میں ہاکی کے قوانین کی تشکیل اور ان میں ترامیم کے عمل کا حصہ ہیں۔

ٹیکنیکل اور اکیڈمک لحاظ سے مضبوط طاہر زمان کو یہ اہم ذمہ داری سونپے جانے پر صدر پی ایچ ایف (PHF) میر محی الدین وانی نے گہری خوشی کا اظہار کرتے ہوئے ان کے لیے نیک خواہشات کا اظہار کیا ہے۔ صدر فیڈریشن کا کہنا ہے کہ طاہر زمان کی شمولیت سے پاکستان ہاکی میں جدید سائنسی خطوط پر کام کا آغاز ہوگا، نچلی سطح (گراس روٹ لیول) پر ٹیلنٹ ابھر کر سامنے آئے گا اور قومی مینیجمنٹ کو کھلاڑیوں کی جسمانی و ذہنی صلاحیتوں کو نکھارنے میں مدد ملے گی۔ ہاکی ماہرین نے اس تقرری کو پاکستان ہاکی کی ترقی کے لیے ایک انتہائی مثبت اور ناگزیر قدم قرار دیا ہے۔