پاکستان ویمنز فٹبال ٹیم کی رینکنگ مردوں کی ٹیم سے بہتر ہے: محسن گیلانی

پاکستان فٹبال فیڈریشن (پی ایف ایف) کے صدر محسن گیلانی نے کہا ہے کہ پاکستان کی ویمنز فٹبال ٹیم کی عالمی رینکنگ مردوں کی ٹیم سے کہیں بہتر ہے اور ملک میں خواتین فٹبال کے فروغ کے لیے فیفا کے تعاون سے ایک جامع حکمت عملی تیار کر لی گئی ہے۔ اسلام آباد میں “ویمن فٹبال اسٹریٹیجی 2026-30” کی رونمائی کی تقریب سے خطاب کرتے ہوئے انہوں نے بتایا کہ قومی خواتین ٹیم نے رواں سال پہلی بار فیفا ٹورنامنٹ میں 8 گولز سے تاریخ ساز کامیابی حاصل کی، جو کھلاڑیوں کی انتھک محنت کا نتیجہ ہے۔

محسن گیلانی کا کہنا تھا کہ فیڈریشن نہ صرف خواتین کھلاڑیوں بلکہ خواتین کوچز اور ریفریز کو بھی آگے لانے کے لیے سازگار ماحول فراہم کر رہی ہے، جس کی مثال پہلی بار قومی مردانہ فٹبال ٹیم کے لیے خاتون مینیجر کا مقرر کیا جانا ہے۔ انہوں نے واضح کیا کہ یوتھ لیول پر نیا ٹیلنٹ تلاش کر کے انڈر 15 ویمنز ٹیم تشکیل دی جائے گی جو آئندہ سال فیفا ایونٹ میں شرکت کرے گی، جبکہ ہوم اور اوے سیریز کی شکل میں میچز کا انعقاد کیا جائے گا۔ پی ایف ایف صدر نے تسلیم کیا کہ پاکستان میں فٹبال کی گورننس ہمیشہ ایک چیلنج رہی ہے، تاہم فیفا کے ساتھ مل کر شفافیت کو فروغ دینے کے لیے اقدامات جاری ہیں جن کے لیے حکومت اور پاکستان اسپورٹس بورڈ کا تعاون انتہائی ضروری ہے۔