پیرو: قدیم اہرام کے قریب سے قدیم انسان کا ڈھانچہ دریافت

لیما: پیرو میں ماہرینِ آثارِ قدیمہ نے دارالحکومت لیما میں واقع مٹی کی اینٹوں سے بنے مشہور قدیم اہرام ‘ہواکا پُکلّانا’ (Huaca Pucllana) کے دامن سے ایک بالغ انسان کا قدیم ڈھانچہ دریافت کیا ہے۔

محققین اور آثارِ قدیمہ کے ماہرین کا ماننا ہے کہ ممکنہ طور پر یہ ڈھانچہ کسی مرد کا ہے، جسے ایک مقدس تالاب سے منسلک نہر کو بند کرنے کی مذہبی رسم کے دوران بطور نذرانہ یا قربانی دفن کیا گیا تھا۔ کھدائی کے دوران پتا چلا کہ لاش کو نہر کے اندر بائیں کروٹ پر لٹایا گیا تھا، جبکہ اس کی کھوپڑی کا رخ اہرام اور بحرالکاہل کی جانب رکھا گیا تھا۔

کھدائی کی سربراہ ماہرِ آثارِ قدیمہ گلیڈیز پاز نے اس دریافت کو انتہائی اہم قرار دیتے ہوئے کہا کہ اس سے قدیم ‘لیما تہذیب’ کی مذہبی رسومات، تدفینی طریقوں اور قربانی کے عقائد کو ازسرِنو سمجھنے میں بڑی مدد ملے گی۔

واضح رہے کہ لیما تہذیب پیرو کے خشک وسطی ساحلی خطے میں پہلی سے ساتویں صدی عیسوی کے دوران قائم رہی۔ یہ تاریخی تہذیب مشہورِ زمانہ انکا سلطنت کے عروج سے تقریباً 700 سال پہلے موجود تھی، اور اس نئی دریافت سے اس خطے کے قدیم باشندوں کی زندگی اور ثقافت پر مزید روشنی پڑے گی۔