پی سی بی نے ٹیلنٹ ہنٹ پروگرام فار اسکولز کے دوسرے سیزن کا اعلان کر دیا

پاکستان کرکٹ بورڈ (پی سی بی) نے ملک بھر میں اسکول کرکٹ کی بحالی اور گراس روٹ لیول سے نیا ٹیلنٹ سامنے لانے کے لیے ’پی سی بی ٹیلنٹ ہنٹ پروگرام فار اسکولز‘ کے دوسرے سیزن (2026-27) کا باضابطہ اعلان کر دیا ہے۔ پی سی بی کے سینئر جنرل منیجر ڈومیسٹک کرکٹ اسامہ شارون اور سابق قومی کپتان مصباح الحق نے پریس کانفرنس کرتے ہوئے بتایا کہ پہلے سیزن کی کامیابی کے بعد اس بار پروگرام کا دائرہ کار 39 اضلاع سے بڑھا کر 100 اضلاع تک پھیلایا جا رہا ہے، جس میں 1200 اسکولز شرکت کریں گے۔ اسکولوں کے ٹریننگ کیمپس 10 اگست سے شروع ہوں گے جبکہ باقاعدہ ٹورنامنٹ 15 ستمبر سے شروع ہو کر ضلعی، ڈویژنل، صوبائی اور قومی سطح کے 4 مرحلوں پر محیط ہوگا۔ پی سی بی تمام شریک اسکولوں کو مالی فنڈنگ اور تکنیکی معاونت فراہم کرے گا تاکہ نوجوان کھلاڑیوں کو جدید ترین سہولیات اور یکساں مواقع میسر آ سکیں۔