پی سی بی ٹیلنٹ ہنٹ پروگرام کا آغاز، سکول کرکٹ ملک بھر میں پھیلانے کا فیصلہ

پاکستان کرکٹ بورڈ (پی سی بی) کے چیئرمین محسن نقوی کی خصوصی ہدایت پر اسکول کرکٹ کا دائرہ کار ملک بھر میں پھیلانے کا بڑا فیصلہ کیا گیا ہے۔ پی سی بی نے گراس روٹ لیول سے نیا اور بہترین کرکٹ ٹیلنٹ دریافت کرنے کے لیے ‘پی سی بی ٹیلنٹ ہنٹ پروگرام فار اسکولز’ کا جامع منصوبہ تیار کیا ہے، جس کے دوسرے سیزن کا باقاعدہ آغاز کیا جا رہا ہے۔ اس پروگرام کے دوسرے سیزن کا افتتاحی میچ رواں ہفتے قذافی اسٹیڈیم لاہور میں بیکن ہاؤس اور ایچیسن کالج کی ٹیموں کے درمیان کھیلا جائے گا۔

قذافی اسٹیڈیم میں یہ اہم میچ دوپہر 2 بجے شروع ہوگا، جبکہ چیئرمین پی سی بی محسن نقوی تقریبِ رونمائی اور افتتاحی میچ کے مہمانِ خصوصی ہوں گے۔ میچ کے فوری بعد شائقینِ کرکٹ اور ڈومیسٹک سپورٹرز کے لیے ایک شاندار میوزیکل کنسرٹ کا بھی اہتمام کیا گیا ہے، جس میں عالمی شہرت یافتہ گلوکار راحت فتح علی خان اپنی فنکارانہ صلاحیتوں کا مظاہرہ کریں گے۔ پی سی بی حکام کے مطابق اسکول کرکٹ کے اس سنسنی خیز افتتاحی میچ اور بعد میں ہونے والے میوزیکل کنسرٹ کے لیے شائقینِ کرکٹ کا اسٹیڈیم میں داخلہ مکمل طور پر مفت ہوگا۔