زمبابوین کھلاڑی پی ایس ایل چھوڑ کر آئی پی ایل سے منسلک، پی سی بی کا ایکشن پر غور

پاکستان کرکٹ بورڈ (پی سی بی) نے زمبابوے کے فاسٹ بولر بلیسنگ مزرابانی کی جانب سے پاکستان سپر لیگ (پی ایس ایل) 2026 سے اچانک دستبرداری پر ان کے خلاف قانونی چارہ جوئی کا فیصلہ کیا ہے۔ مزرابانی نے انڈین پریمیئر لیگ (آئی پی ایل) کی ٹیم کولکتہ نائٹ رائیڈرز (کے کے آر) کے ساتھ معاہدہ طے پانے کے بعد اسلام آباد یونائیٹڈ کو اپنی عدم دستیابی سے متعلق آگاہ کیا تھا۔

پی سی بی حکام کا مؤقف ہے کہ مزرابانی نے بورڈ کے ساتھ باقاعدہ معاہدہ کیا تھا اور عین سیزن کے موقع پر اسے توڑنا قواعد و ضوابط کی سنگین خلاف ورزی ہے۔ مزرابانی کو اسلام آباد یونائیٹڈ نے ویسٹ انڈین بولر شیمار جوزف کے متبادل کے طور پر براہ راست سائن کیا تھا، تاہم اب وہ کے کے آر میں بنگلہ دیشی بولر مستفیض الرحمان کی جگہ شامل ہو گئے ہیں۔ یاد رہے کہ پی سی بی نے گزشتہ برس جنوبی افریقی کھلاڑی کوربین بوش کے خلاف بھی اسی نوعیت کی خلاف ورزی پر قانونی کارروائی کی تھی، جس سے یہ واضح ہوتا ہے کہ بورڈ اب لیگ کے تقدس اور معاہدوں کی پاسداری پر کوئی سمجھوتہ نہیں کرے گا۔