پی سی بی نے قومی کرکٹرز کو بیرونِ ملک لیگز کیلئے این او سی جاری کر دیے

پاکستان کرکٹ بورڈ (PCB) نے قومی کرکٹرز کو بیرونِ ملک مختلف انٹرنیشنل لیگز اور کاؤنٹی کرکٹ میں شرکت کے لیے این او سی (NOC – No Objection Certificate) جاری کر دیے ہیں۔

پی سی بی کے مطابق سپنر نعمان علی کو 27 ستمبر تک انگلش کاؤنٹی لنکا شائر کی نمائندگی کرنے کے لیے این او سی دیا گیا ہے۔ اس کے علاوہ کیریبین پریمیئر لیگ (CPL) کے لیے بھی متعدد اہم کرکٹرز کو گرین سگنل دے دیا گیا ہے۔

سی پی ایل (CPL) میں شرکت کرنے والے کھلاڑیوں میں نسیم شاہ، شاداب خان، حسن نواز، حنین شاہ، عثمان خان، معاز صداقت، صاحبزادہ فرحان اور سفیان مقیم شامل ہیں۔ مزید برآں، محمد حارث کو 7 اگست سے 20 ستمبر، عثمان طارق کو 8 اگست سے 18 ستمبر، اور اسامہ میر کو 7 اگست سے 21 ستمبر تک سی پی ایل کھیلنے کا این او سی دیا گیا ہے۔ بورڈ کے مطابق اکثر قومی کھلاڑیوں کو 19 اگست سے 21 ستمبر کے درمیانی عرصے کے لیے این او سیز جاری کیے گئے ہیں۔