پاکستان کرکٹ بورڈ نے علیم ڈار کا استعفیٰ منظور کر لیا، نئی سلیکشن کمیٹی تشکیل

پاکستان کرکٹ بورڈ (PCB) نے چیف سلیکٹر علیم ڈار کا استعفیٰ منظور کر لیا ہے اور اس کے بعد پی سی بی ویب سائٹ پر نئی سلیکشن کمیٹی کی تفصیلات اپڈیٹ کر دی گئی ہیں۔

نئی کمیٹی میں سابق کپتان مصباح الحق اور سرفراز احمد قومی سلیکشن کمیٹی کے ممبران کے طور پر شامل کیے گئے ہیں، جبکہ عاقب جاوید اور اسد شفیق بھی کمیٹی کا حصہ رہیں گے۔

ویمنز سلیکشن کمیٹی میں اسد شفیق اور کپتان و ہیڈ کوچ بتول فاطمہ کو ممبر شامل کیا گیا ہے۔

اس تبدیلی کے بعد علیم ڈار کی جگہ سرفراز احمد اور اظہر علی کی جگہ مصباح الحق کو سلیکشن کمیٹی میں شامل کیا گیا ہے، اگرچہ مصباح الحق پہلے بھی کمیٹی کے رکن تھے۔

پی سی بی کا کہنا ہے کہ یہ تبدیلیاں قومی کرکٹ میں سلیکشن کے عمل کو مزید شفاف اور مؤثر بنانے کے لیے کی گئی ہیں۔