پاکستانی شہری نے ابوظہبی میں 1 کروڑ 50 لاکھ درہم کی لاٹری جیت لی

ابوظہبی: متحدہ عرب امارات کی معروف ابوظہبی ’بگ ٹکٹ‘ (Big Ticket) کی سیریز 290 کی لائیو قرعہ اندازی میں پاکستان کے 64 سالہ شہری شوکت آفتاب نے 1 کروڑ 50 لاکھ درہم (تقریباً 1 ارب 14 کروڑ پاکستانی روپے) کا بہت بڑا گرینڈ پرائز جیت لیا ہے۔

لاٹری انتظامیہ نے ٹکٹ نمبر 245556 پر کامیابی حاصل کرنے کے بعد جب شوکت آفتاب کو پاکستان فون کر کے اس زبردست کامیابی کی اطلاع دی تو انہوں نے ابتدا میں اسے ایک جعلی یا سپیم (Spam) کال سمجھتے ہوئے یقین کرنے سے انکار کر دیا۔ انتظامیہ کے میزبانوں نے انہیں بگ ٹکٹ کی آفیشل ویب سائٹ اور یوٹیوب لائیو سٹریمنگ پر اپنا ٹکٹ نمبر تصدیق کرنے کا مشورہ دیا، جس کے بعد آن لائن تصدیق کرتے ہی ان کی خوشی کا کوئی ٹھکانہ نہ رہا۔

حکام کے مطابق شوکت آفتاب گزشتہ 15 برسوں سے باقاعدگی سے بگ ٹکٹ کی لاٹری خرید رہے تھے اور بالآخر ان کی سالہا سال کی کوشش رنگ لے آئی۔ اسی قرعہ اندازی کے دوران دیگر 5 خوش نصیبوں، جن میں 4 بھارتی شہری اور 1 بنگلہ دیشی شہری شامل ہیں، نے بھی بالترتیب 1، 1 لاکھ درہم کے نقد انعامات جیتے۔