قومی سائیکلسٹ نتالیہ خان 28 برس کی عمر میں انتقال کر گئیں

پاکستان کی معروف خاتون کھلاڑی اور قومی سائیکلسٹ نتالیہ خان محض 28 برس کی عمر میں خالقِ حقیقی سے جا ملیں۔ ان کے انتقال کی خبر سے پاکستان کی کھیلوں کی برادری میں سوگ کی لہر دوڑ گئی ہے۔

پاکستان سائیکلنگ فیڈریشن کے صدر سید اظہر علی شاہ نے افسوسناک خبر کی تصدیق کرتے ہوئے بتایا کہ نتالیہ خان طویل عرصے سے گردوں کے عارضے میں مبتلا تھیں۔ ان کی زندگی بچانے کے لیے سرجری بھی کی گئی، تاہم وہ آپریشن کے بعد جانبر نہ ہو سکیں اور ان کی طبیعت مزید بگڑتی چلی گئی جو بالآخر جان لیوا ثابت ہوئی۔

نتالیہ خان نہ صرف ایک بہترین سائیکلسٹ تھیں بلکہ انہوں نے روئنگ کے کھیل میں بھی قومی سطح پر اپنی صلاحیتوں کا لوہا منوایا تھا۔ سید اظہر علی شاہ اور پاکستان سائیکلنگ فیڈریشن کے تمام اراکین نے مرحومہ کے درجات کی بلندی کے لیے دعا کی اور ان کے سوگوار خاندان سے دلی ہمدردی اور تعزیت کا اظہار کیا۔