ایشیاکپ سیمی فائنل میں سلو اوور ریٹ، پاکستان ویمنز ٹیم پر جرمانہ

ویمنز ٹی ٹوئنٹی ایشیا کپ 2026 کے سیمی فائنل میں سری لنکا کے خلاف سلو اوور ریٹ کی مرتکب ہونے پر پاکستان ویمنز کرکٹ ٹیم پر مالی جرمانہ عائد کر دیا گیا ہے۔ انٹرنیشنل کرکٹ کونسل (آئی سی سی) کے مطابق گرین شرٹس مقررہ وقت کے اندر ایک اوور کم کرانے کی قصوروار پائی گئیں، جس کی پاداش میں کھلاڑیوں پر میچ فیس کا 5 فیصد جرمانہ کیا گیا ہے۔

آئی سی سی کے ضوابط کے مطابق مقررہ وقت میں کم کرائے گئے ہر اوور پر کھلاڑیوں کو میچ فیس کے 5 فیصد جرمانے کا سامنا کرنا پڑتا ہے۔ قومی ویمنز ٹیم کی کپتان فاطمہ ثناء نے اپنی غلطی تسلیم کرتے ہوئے میچ ریفری کی جانب سے عائد کردہ جرمانہ قبول کر لیا ہے، جس کے بعد معاملے پر رسمی سماعت کی ضرورت نہیں پڑی۔ واضح رہے کہ پاکستان ویمنز ٹیم اس سیمی فائنل میں دفاعی چیمپئن سری لنکا کے ہاتھوں شکست کھا کر ایشیا کپ کے فائنل کی دوڑ سے باہر ہو گئی تھی۔