پہلا ون ڈے: پاکستان نے سری لنکا کو 5 وکٹوں سے شکست دیدی

پاکستان ویمنز کرکٹ ٹیم نے تین میچوں پر مشتمل ون ڈے سیریز کے پہلے مقابلے میں سری لنکا کو 5 وکٹوں سے شکست دے کر سیریز میں 0-1 کی برتری حاصل کرلی ہے۔ ہمبنٹوٹا میں کھیلے گئے اس میچ میں سری لنکا ویمنز نے ٹاس جیت کر پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 210 رنز بنائے۔ پاکستان کی جانب سے نشرا سندھو نے شاندار بولنگ کا مظاہرہ کرتے ہوئے 3 وکٹیں حاصل کیں جبکہ تسمیہ رباب نے 2 کھلاڑیوں کو آؤٹ کیا۔ جواب میں 211 رنز کے ہدف کے تعاقب میں پاکستان ویمنز ٹیم نے ذمہ دارانہ اور جارحانہ بیٹنگ کی بدولت مطلوبہ ہدف 43 اوورز میں 5 وکٹوں کے نقصان پر حاصل کر لیا۔ فتح میں گل فیروزہ کی 78 رنز کی جارحانہ اور سدرہ امین کی 57 رنز کی متوازن اننگز نے بنیادی کردار ادا کیا۔ دونوں ٹیموں کے درمیان سیریز کا دوسرا ون ڈے میچ ہفتے کو کھیلا جائے گا، جہاں قومی ٹیم کی نظریں سیریز اپنے نام کرنے پر ہوں گی۔