پاکستان ویمنز ٹیم کی ترکس اینڈ کیکوس آئی لینڈز کو ہراکر فیفا سیریز میں تاریخی فتح

آئیوری کوسٹ کے شہر عابد جان میں جاری فیفا سیریز میں پاکستان ویمن فٹبال ٹیم نے ٹرکس اینڈ کیکوس جزائر کو آٹھ صفر (0-8) کے عبرتناک اسکور سے ہرا کر تاریخ رقم کر دی ہے۔ یہ پاکستان کی خواتین ٹیم کی انٹرنیشنل فٹبال کی تاریخ میں اب تک کے سب سے بڑے مارجن سے حاصل کی گئی فتح ہے۔ میچ کے آغاز سے ہی قومی کھلاڑیوں نے حریف ٹیم پر مکمل برتری حاصل کر لی تھی، جس کا نتیجہ یہ نکلا کہ پہلے ہاف کے اختتام تک پاکستان نے چار صفر کی مستحکم پوزیشن حاصل کر لی۔ پہلے ہاف میں زہمینہ ملک، اقصیٰ مشتاق، لیلیٰ بنارس اور مریم محمود نے گیند کو جال کی راہ دکھا کر ٹیم کو سبقت دلائی۔

دوسرے ہاف میں بھی پاکستانی شاہینوں نے اپنے حملوں کی شدت کم نہ کی اور حریف دفاع کو تہس نہس کرتے ہوئے مزید چار گول داغ دیے۔ اس ہاف میں لیلیٰ بنارس اور اقصیٰ مشتاق نے انفرادی طور پر اپنا دوسرا گول اسکور کیا، جبکہ نادیہ خان اور اسریٰ خان نے بھی ایک ایک گول کر کے میچ کو یادگار بنا دیا۔ اس شاندار اور تاریخی کامیابی پر فٹبال حلقوں میں خوشی کی لہر دوڑ گئی ہے اور اسے پاکستان میں خواتین فٹبال کے ایک نئے اور روشن دور کا آغاز قرار دیا جا رہا ہے۔ اس فتح نے نہ صرف ٹیم کے حوصلے بلند کیے ہیں بلکہ عالمی سطح پر پاکستانی ویمن فٹبال کی صلاحیتوں کا لوہا بھی منوایا ہے۔