پاکستان ویمن کرکٹ ٹیم کا جاپان کے شہر ناگویا میں بھرپور ٹریننگ سیشن

ایشین گیمز 2026ء میں شرکت کے لیے جاپان کے شہر ناگویا میں موجود پاکستان ویمن کرکٹ ٹیم نے اپنے پہلے میچ کی تیاریوں کے سلسلے میں پریکٹس سیشن کے دوران بھرپور اور سخت محنت کی ہے۔ کھلاڑیوں نے ہیڈ کوچ اور سپورٹنگ اسٹاف کی زیرِ نگرانی بیٹنگ، باؤلنگ، فیلڈنگ اور فزیکل فٹنس کے شعبوں میں جامع مشقیں کی تاکہ اہم مقابلے سے قبل خود کو مقامی حالات کے مطابق ڈھالا جا سکے۔ پاکستان ویمن کرکٹ ٹیم ایونٹ میں اپنا پہلا میچ 17 ستمبر کو تھائی لینڈ کے خلاف کھیلے گی۔

ایشین گیمز کے لیے قومی خواتین کرکٹ ٹیم کا 14 رکنی سکواڈ گزشتہ پیر کی صبح دبئی سے جاپان روانہ ہوا تھا، تاہم وکٹ کیپر بیٹر منیبہ علی والدہ کی اچانک علالت کے باعث ٹیم کے ہمراہ سفر نہ کر سکیں اور فی الحال پاکستان میں ہی موجود ہیں۔ قومی ویمن ٹیم کے انتظامیہ اور کھلاڑیوں نے تھائی لینڈ کے خلاف میچ میں فتح حاصل کر کے ایونٹ میں فاتحانہ آغاز کرنے کا عزم ظاہر کیا ہے۔