پاکستان نے تیسری بار سینٹرل ایشین مینز والی بال چیمپئن شپ جیت لی

پاکستان نے بہترین کھیل کا مظاہرہ کرتے ہوئے مسلسل تیسری بار سینٹرل ایشین مینز والی بال چیمپئن شپ کا ٹائٹل اپنے نام کر لیا ہے۔ چیمپئن شپ کے فائنل میچ میں قومی ٹیم نے شاندار کارکردگی دکھاتے ہوئے بنگلہ دیش کو یکطرفہ مقابلے کے بعد 0-3 سے شکست دی۔ پاکستانی ٹیم نے یہ کامیابی 20-25، 16-25 اور 20-25 کے اسکور سے حاصل کی، جبکہ پوری چیمپئن شپ کے دوران قومی ٹیم ناقابلِ شکست رہی۔

وزیراعظم شہباز شریف نے والی بال چیمپئن شپ جیتنے پر قومی ٹیم کو مبارکباد دیتے ہوئے کہا کہ فائنل میں فتح حاصل کر کے ٹائٹل اپنے نام کرنا پوری قوم کے لیے باعثِ فخر ہے۔ انہوں نے کھلاڑیوں، کوچز اور مینجمنٹ کے نظم و ضبط اور مثالی ٹیم ورک کو سراہتے ہوئے کہا کہ ہمارے باصلاحیت نوجوان ہر میدان میں ملک کا نام روشن کرنے کی صلاحیت رکھتے ہیں۔

وزیراعظم نے عزم ظاہر کیا کہ حکومت کھیلوں کے فروغ اور نوجوان کھلاڑیوں کی سرپرستی کا سلسلہ جاری رکھے گی، اور انہوں نے قومی والی بال ٹیم کے لیے مستقبل کے بین الاقوامی مقابلوں میں بھی مزید کامیابیوں کی نیک خواہشات کا اظہار کیا۔