پاکستان کی ایف کلاس ورلڈ چیمپئن شپ میں شاندار کارکردگی، 4 گولڈ، 4 سلور اور 5 کانسی کے تمغے جیت لیے

برطانیہ کے شہر بسلی میں منعقدہ 7ویں ایف کلاس ورلڈ چیمپئن شپ 2026 میں پاکستان کے 12 رکنی شوٹنگ دستے نے تاریخ رقم کرتے ہوئے مجموعی طور پر 13 تمغے (4 گولڈ، 4 سلور اور 5 کانسی) اپنے نام کر لیے ہیں۔ ایونٹ کی سب سے بڑی انفرادی کامیابی لیفٹیننٹ کرنل جنید علی زلفقار نے حاصل کی، جنہوں نے 800، 900 اور 1000 گز کے مقابلوں میں شاندار مستقل مزاجی کا مظاہرہ کرتے ہوئے ایف ٹی آر انفرادی ورلڈ چیمپئن کا اعزاز جیت لیا۔

پاکستان کی جانب سے لیفٹیننٹ کرنل جنید علی نے 3 گولڈ، 1 سلور اور 1 براؤنز، جبکہ سپاہی محمد ولید نے 1 گولڈ اور 1 براؤنز میڈل جیتا۔ انڈر 25 کیٹیگری میں حذیفہ گل نے 3 سلور اور 2 براؤنز اور احسن گلریز نے 1 براؤنز حاصل کیا۔ اس تاریخی فتح سے قبل بسلی میں ہونے والے ایف کلاس برٹش اوپن 2026 میں بھی پاکستانی ٹیم نے 7 گولڈ سمیت 13 تمغے اپنے نام کیے تھے، جو عالمی سطح پر لانگ رینج شوٹنگ کے شعبے میں پاکستان کی ابھرتی ہوئی طاقت کا واضح ثبوت ہے۔