پاکستان انڈر 19 ٹیم کا انگلینڈ میں بھرپور ٹریننگ سیشن

پاکستان انڈر 19 کرکٹ ٹیم نے انگلینڈ کے تاریخی ارونڈل کاسل کرکٹ گراؤنڈ میں سیریز کی تیاریوں کے سلسلے میں اپنے پہلے ٹریننگ سیشن میں حصہ لیا اور دوپہر کے وقت بھرپور پریکٹس کی۔ ٹریننگ کے آغاز پر ہیڈ کوچ شاہد انور نے کھلاڑیوں سے گفتگو کی اور خاص طور پر بیٹرز کو انگلش کنڈیشنز سے جلد از جلد ہم آہنگ ہونے کی ہدایات دیں۔ کوچنگ اسٹاف کی نگرانی میں نیٹ سیشن کے دوران کھلاڑیوں نے بیٹنگ، بولنگ اور فیلڈنگ کی مشقیں کیں۔ واضح رہے کہ پاکستان انڈر 19 ٹیم انگلینڈ انڈر 19 کے خلاف ایک یوتھ ٹیسٹ اور چار یوتھ ون ڈے میچز پر مشتمل سیریز کھیلے گی، جو 2 سے 16 ستمبر تک جاری رہے گی۔