سیف گیمز کیلئے بھارت نے پاکستان آنے کی آمادگی ظاہر کردی

اسلام آباد: پاکستان 23 سال کے طویل عرصے بعد ساؤتھ ایشین گیمز (سیف گیمز) کی میزبانی کے لیے تیار ہے، جبکہ روایت توڑتے ہوئے بھارت نے بھی ان کھیلوں میں شرکت کی باضابطہ دعوت قبول کر لی ہے۔ساؤتھ ایشین اولمپکس ایسوسی ایشن کے اعلیٰ سطح کے اجلاس میں بھارتی نمائندوں نے شرکت کی اور پاکستان میں منعقد ہونے والے مقابلے میں اپنے کھلاڑیوں کو بھیجنے کے حوالے سے مثبت اور باضابطہ رضامندی کا اظہار کیا۔ طے شدہ شیڈول کے مطابق ساؤتھ ایشین گیمز کا انعقاد اپریل 2027ء میں پاکستان میں ہوگا۔پاکستان اولمپک ایسوسی ایشن (POA) کے سیکرٹری جنرل خالد محمود نے اس پیش رفت کی تصدیق کرتے ہوئے بتایا کہ جنوبی ایشیائی خطے کے اس سب سے بڑے اسپورٹنگ ایونٹ کے لیے تیاریاں شروع کر دی گئی ہیں۔ میگا ایونٹ کے دوران وفاقی دارالحکومت اسلام آباد میں 15 مختلف کھیلوں کے مقابلے منعقد ہوں گے، جن میں اسکوائش، ٹینس، مارشل آرٹس اور دیگر تمام اہم ملکی و بین الاقوامی ایونٹس شامل ہیں۔